चितवन ।पूर्वमन्त्री एवम् राप्रपाका उपाध्यक्ष विक्रम पाण्डेले राजनीति वा विकास र समृद्धि रोज्ने बेला आएको बताउनुभएको छ । भरतपुर–१५ फुलबारीमा नेपाल राष्ट्रिय भूतपूर्व सैनिक संघले गरेको शुभकामना आदानप्रदान तथा भेटघाट कार्यक्रममा बोल्दै उहाँले फोस्रा चुनावी नारा भन्दा विश्वासिलो व्यक्तिलाई चुन्न आग्रह गर्नुभएको छ ।

उहाँ चितवन क्षेत्र नम्बर ३ मा प्रतिनिधिसभा सदस्य पदका लागि उम्मेदवार हुनुहुन्छ । “राजनीति चाहिने भए राजनीतिक खेलाडीलाई भोट दिए हुन्छ”, उहाँले भन्नुभयो, “विकास, समृद्धि, राष्ट्रवादी सोच भएको चाहिएमा राप्रपालाई भोट दिनुस ।” उहाँले यसपालीको चुनावलाई विगतका ४ वटा निर्वाचनको समिक्षा गर्दै सहि नेतृत्व छनौट गर्न आग्रह गर्नुभयो । “आफ्नो मान्छे, आफ्नो पार्टी भनेर भोट नदिनुस”, उहाँले भन्नुभयो, “चुनावमा मात्रै झुल्किने नेता होइन, हार्दा–जित्दा सधै सँगै हुनेलाई सांसद बनाउनुस् ।”

उहाँले यसपालीको निर्वाचन संवेदनशील रहेकाले राष्ट्रलाई विदेशीको कव्जाबाट जोगाउन राष्ट्रवादी उम्मेदवारहरुलाई जिताउनुपर्ने बताउनुभयो । “जनताको मन जित्ने काम गर्नेहरु लुकेर घेराउमा हिड्नैपर्दैन”, उहाँले भन्नुभयो, “चुनाव जितेपछि भागिहाल्ने, हारे पछि पनि कहिल्यै नआउनेहरुलाई नरोजौँ ।”

पाण्डे २०५६ सालदेखि लगातार चितवनबाट एकै निर्वाचन क्षेत्रमा उम्मेदवारी दिदै आउनुभएका उहाँ यसपाली ५ औँ पटक उम्मेदवार बन्नुभएको हो । उहाँले देशहित विपरितका कामहरु हुन नदिन राप्रपा पहरेदारका रुपमा उभिने भएकाले यसपाली राप्रपाको पक्षमा मतदान गर्न आग्रह गर्नुभयो । देश अभिभावकविहिन बनेकाले राष्ट्रवादीहरुलाई जिताउनुपर्नेमा जोड दिनुभयो ।