चितवन – भरतपुर महानगरपालिका ५ तोरीखेतमा शनिबार अन्तर टोल बिकास संस्था स्तरीय हाजिरी जवाफ प्रतियोगिता हुने भएको छ ।

सिर्जनशिल टोल बिकास संस्थाको आयोजनामा स्थानीय होटल डबकामा प्रतियोगिता हुन लागेको हो । प्रतियोगिताको भरतपुर ५ का वडाध्यक्ष युद्धप्रसाद श्रेष्ठले उद्घाटन गर्नेछन् ।

प्रतियोगितामा वडा नम्बर ५ भित्रका २९ टोल बिकास संस्था मध्ये १६ टोली सहभागी हुने संयोजक अर्जुन गिरीले जानकारी दिए । प्रत्येक टोलीमाकक्षा १० सम्म अध्ययन गर्ने तीन-तीन जना विद्यार्थी हुनेछन् । हरेक टिममा एक छात्रा अनिवार्य गरिएको गिरीले बताए । १६ टोलीबाट आठ टोली छनौट चरण पार्दै गर्दै दोस्रो चरणमा प्रवेश गर्नेछन् ।

प्रतियोगिताको विजेताले १५ हजारसहित शिल्ड र प्रमाणपत्र प्राप्त गर्नेछ । दोस्रो हुनेले दश हजार, तेस्रोले पाँच तथा सान्त्वनाले तीन हजार रुपैयाँ प्राप्त गर्ने उनले बताए । कार्यक्रम सम्पन्न गर्न एक लाख ४३ हजार खर्च हुने अनुमान गरिएको छ ।

टोल बिकास संस्थाहरुबीच मैत्रीपूर्ण सम्बन्ध कायम गर्नका लागि प्रतियोगिता आयोजना गरिएको संस्थाका अध्यक्ष नेत्रनारायण आचार्यले जानकारी दिए । यस्तै मोबाइलमा व्यस्त हुने अहिलेका बाल-बालिकालाई बाहिरी ज्ञानका लागि पनि कार्यक्रम उपयोगी हुने उनको विश्वास छ । स्याण्डबीच होम सोलुसन मुख्य प्रायोजक रहेको कार्यक्रमको प्रवर्द्धक संस्थामा भरतपुर ५ को वडा कार्यालय रहेको छ ।