चितवन – चितवन क्षेत्र नम्बर २ का प्रतिनिधि सभा सदस्यका स्वतन्त्र उम्मेदवार भाष्कर न्यौपानेले चितवनलाई बागमती प्रदेशको राजाधानी बनाउन जोड दिने बताएका छन् ।
सूर्यमुखी फूल चुनाव चिन्ह लिएर चुनावी मैदानमा उत्रिएका न्यौपानेले मदेश प्रदेशको ठोरी गाउँपालिकालाई बागमती प्रदेशमा मिलाउन र चितवनलाई प्रदेश राजाधानी बनाउन जोड दिने बताएका हुन् ।
उनले जन निर्वाचित कार्यकारी प्रधानमन्त्री चयनलाई पनि आफूले प्राथमिकतामा राख्ने बताए । दलसंँग जनताको वितृष्णा र डर भएका कारण पनि देश परिवर्तनको लागि आफ्नो स्वतन्त्र उम्मेद्वारी दिएको उनको भनाई छ ।

अन्तराष्ट्रिय असान्दर्भिक सम्झौताहरु खारेज, गुमेका भूमिहरु फिर्ता, नेपाललाई शान्ति क्षेत्र घोषणा गर्न बाँकी देशहरुमा घोषणा गराउने, अति विपन्न वर्गलाई गास, बास र कपासको व्यवस्थासहित स्वास्थ्य र शिक्षा निःशुल्क, पर्यटन प्रवर्द्धन र रोजगारी सृजना, भूमिहिन सुकुम्बासीलाई लालपूर्जा वितरणलगायतको योजना रहेको पनि सुनाए ।

उनले जनताको मन र मतले आफू विजयी हुने विश्वास व्यक्त गरे । परिवर्तन र बिकास चाहने जनताले आफूलाई भोट हाल्ने समेत उनको भनाइ छ । प्रतिनिधि र प्रदेश सभा निर्वाचन मंसिर ४ गते हुँदैछ ।