भरतपुर। कतारमा आइतबार राती सम्पन्न २२औँ विश्वकप फुटबलको फाइनल खेल भरतपुरमा ३५ फुटको पर्दामा हेरिएको छ । भरतपुरस्थित सिजी ल्याण्डमार्कमा सयौँको संख्यामा युवाहरुले फाइनल खेल डिजिटल पर्दामा निःशुल्क हेरेका हुन् ।

सिजी ल्याण्डमार्कसँगको सहकार्यमा डिजिटल मार्केटिङका लागि मलमा डिजिटल डिस्प्ले बोर्ड राखेको बेदान्त मल्टीपर्पोज कम्पनीले विश्वकपका खेलहरु देखाउँदै आएको थियो । ‘अर्जेन्टिना र फ्रान्सबीचको फाइनल खेल हेर्न हजार जनाभन्दा बढी जम्मा भएका थिए’ बेदान्तका अध्यक्ष नवीनराज पौडेलले भने । उनका अनुसार भिडले गर्दा सिजी ल्याण्डमार्क अगाडिको सडकमा ट्राफिक व्यवस्थापन गर्न हम्मेहम्मे परेको पौडेलले बताए ।

प्रोफेसनल मिडिया ग्रुपका अध्यक्ष समेत रहेका पौडेलले कोभिडको कारण व्यवसायमा मन्दी आएपछि रित्तो अवस्थामा रहेको डिजिटल बोर्डमा निःशुल्करुपमा विश्वकप फुटबलका खेल १५ बाइ ३५ फुटको डिजिटल पर्दामा देखाइएको पौडेलले जानकारी दिए । ५२५ स्क्वायर फुटको यो पर्दा भरतपुरमा संभवत सबैभन्दा ठूलो पर्दा हो ।