चितवन। लक्की मिडिया हाउस चितवनले आयोजना गर्ने लक्की फिल्मी अवार्डको दोस्रो संस्करण आगामी असार ८ गते हुने भएको छ । पहिलो संस्करण पूर्ण सफलता पछि मिडीया हाउसले यो संस्करणलाई निरन्तरता दिन लागेको हो ।
मिडियाका महाप्रबन्धक हरि कार्की लक्कीले दोस्रो संस्करणको लक्की फिल्मी अवार्ड २०८१ असार ८ गते गरिने जानकारी दिनुभयो ।
मोफसलकै चर्चित लक्की मिडिया हाउस चितवनको आयोजनामा ‘चलचित्र उद्योगको प्रर्वद्धन र प्रोत्साहन, कलाकारलाई हौसला र सम्मान’ भन्ने नाराका साथ लक्की फिल्मी अवार्डको दोस्रो संस्करण गर्न लागिएको कार्कीले बताउनु भयो । मोफसलमा रहेर पनि नेपाली सिनेजगतको संरक्षण र जगेर्ना गर्नका लागि अवार्ड कार्यक्रम आयोजना गरिएको उहांँको भनाई छ । अवार्ड कार्यक्रममा २४ विधाका कलाकार र स्रष्टालाई सम्मान गरिनेछ ।

‘लक्की फिल्मी अवार्डको पहिलो संस्करण सफलताका साथ सम्पन्न गर्न पाउँदा हामी उत्साहित भएका छौँ’ उहाँले भन्नुभयो, ‘दोस्रो संस्करण असार ८ गते गर्ने गरी हामी तयारीमा जुटेका छौँ ।’ चितवनको इतिहासमा नै लक्की मिडिया हाउसले पहिलो पटक फिल्मी अवार्ड गरेको हो । अवार्डका दोस्रो संस्करणका लागि आयोजकले प्रचार–प्रसार र अन्तरक्रिया कार्यक्रमलाई तीव्र बनाएको उहाँले बताउनु भयो ।

विभिन्न जिल्लामा गएर अवार्डमा सहभागी हुनका लागि निमन्त्रणा दिने, अन्तरक्रिया गर्ने र भेटघाटका कार्यक्रम अघि बढाइन लागिएको कार्कीले जानकारी दिनुभयो । २०७१ सालमा चितवनमा स्थापना गरिएको लक्की मिडिया हाउसले मोफसलमा रहेर नेपाली सिनेमा बजारको प्रचार र यसकोे प्रर्वद्धनका लागि सिर्जनात्मक र रचनात्मक काम गर्दै आएको छ ।