चितवन । नारायणगढ स्थित बालकुमारी माध्यमिक विद्यालयले विभिन्न रचनात्मक कार्यक्रम गरी बार्षिकोत्सव मनाएको छ । विद्यालयले माघ ७ देखि १२ गते सम्म आफ्नो ५८ औं बार्षिकोत्सव मनाएको हो । शुक्रबार सम्पन्न कार्यक्रममा विद्यालयले खेलकुद, साहित्य, सिर्जनाका विजेता विद्यार्थी लगायत उत्कृष्ट शिक्षक तथा कर्मचारीहरुलाई सम्मान गरेको थियो । समापन कार्यक्रममा प्रमुख अतिथि भरतपुर वडा नम्बर २ का अध्यक्ष मनोज रानाभाट , विशिष्ट अतिथिमा भरतपुर शैक्षिक महाशाखाका ऋषिराम पौडेल, लेखक तथा वरिष्ठ साहित्यकार खगेन्द्र संग्रौला लगायतको सहभागिता थियो ।

सो अवसरमा बोल्दै अध्यक्ष रानाभाटले बालकुमारी विद्यालयले शिक्षाको गुणस्तर बृद्धि गरेर साख फर्काउनुपर्नेमा जोड दिनुभयो । विद्यालयको शैक्षिक ,पूर्वाधार विकास वडाले सहयोग गर्ने बताउंँदै विद्यार्थीको संख्या बृद्धि गर्नुपर्ने बताउनु भयो । विशिष्टि अतिथि संग्रौलाले विद्याललयमा आफूले अध्यापन गराएको स्मरण गर्दै उहांँले शिक्षाको उनन्नयनमा बालकुमारी योगदानको प्रशंसा गर्नुभयो ।

कार्यक्रममा विद्यालयका प्रधानाध्यापक आनन्दराज सापकोटाले विद्यालयको बार्षिक प्रतिवेदन प्रस्तुुत गर्नुभएको थियो । सुरेन्द्र प्रसाद पौडलले स्वागत मन्तव्य दिनुभएको कार्यक्रमको सभापतित्व विद्यालय व्यवस्थापन समितिका अध्यक्ष गोपाल भट्टराईले गर्नु भएको थियो । अध्यक्ष भट्टराईले विद्यालयको शैक्षिक , भौतिक पूर्वाधारमा विस्तारै सुधार भएको भन्दै सबैको साथ र सहयोगले मात्र विद्यालयले इतिहास फर्काउने विचार व्यक्त गर्नुभयो ।
कार्यक्रममा बालकुमारी कलेजका प्रिन्सिपल जगदीश्वर खनाल, अमर श्रेष्ठ, अभिभावक संघका अध्यक्ष रिमेश श्रेष्ठ लगायतले शुभकामना मन्तव्य व्यक्त गर्नुभएको थियो ।

हाल विद्यालयमा शिशु कक्षा देखि १२ कक्षासम्म ६५० जना विद्यार्थी अध्ययनरत छन । ९ विघा ४ कठ्ठा ११ धुर क्षेत्रफल रहेको यस विद्यालयमा ४६ वटा कोठा, प्रयोगशाला कक्ष, कार्याशाला कक्ष, पुस्तकालय चमेना गृह लगायतका संरचना छन ।