चितवन । मंगोल नेसनल अर्गनाईजेसन पार्टीको मंगोल जागरण अभियान तथा केन्द्रिय आम भेला चितवनको भरतपुरमा सम्पन्न भएको छ ।
अर्गनाइजेसन पार्टी, भरतपुर महानगरपालिकाले भरतपुर वडा नम्बर २०स्थित माइलीचोकमा आयोजना गरेको भेलामा केन्द्रिय , प्रदेश तथा जिल्लाका नेता कार्यकर्ताहरुको सहभागिता रहेको थियो ।
अर्गानाइजेशनले आफ्नो मंगोलबासीको हक, अधिकार र अस्तित्वको रक्षा गर्न केन्द्रिय स्तरको भेला राखेको जनाएको छ ।
भेलामा बोल्दै प्रमुख अतिथि तथा अर्गनाईजेसनका केन्द्रिय सचिव सन्तोष तामाङ्गले मंगोलबासीलाई जागरुक बनाउन र सचेतना गराउन भेला उपलब्धीमुलक हुने बताउनु भयो । नेपालको ऐतिहासिक राजनैतिक, आर्थिक सामाजिक विकासमा मंगोलबासीको ठुलो योगदान रहेको बताउंँदै यसलाई आम जनतामाझ पुर्याउन पनि भेला आबश्यक रहेको बताउनु भयो । आफूहरु सदियौंदेखि पिल्सिदै र उत्पीडनमा परेकोले अब एकजुट भएर अघि बढ्ने समेत उहाँको भनाई थियो । ‘अब ४०० बर्षदेखि हामी हिन्दु र आर्यको चपेटामा पर्यौं अब हामी एकजुट हुने बेला आएको छ ।’उहांँले भन्नुभयो । ३५ बर्षदेखि राष्ट्रका मुख्य दलहरुलाई सहयोग गर्दै आएपनि उनीहरुले मंगोलबासीलाई वेवास्ता गर्दै आएको बताउनु भयो ।
केन्द्रिय प्रचार प्रसार विभागका सचिव श्याम लिम्बुले मंगोलबासी अब राजनैतिक चेतना बिना अघि बढ्न नसक्ने बताउनु भयो । ‘तपाई शिक्षामा अब्बल हुनुस , जतिसुकै धनसम्पत्तिमा सम्पन्न हुनुस राजनीतिक चेतना भएन भने ह जहांँको त्यही हुनुहुन्छ ।’ लिम्बुले भन्नुभयो । उहांँले मंगोलबासीको बाहुल्यता ८० प्रतिशत नेपालमा भएपनि २० प्रतिशत आर्य र बाहुन समुदायले वर्चस्व कायम गर्दै आएकोले अबको राष्ट्रिय राजनीतिमा सक्रिय रुपमा सबै मंगोलबासी लाई आग्रह गर्नुभयो ।
अन्य दलले मंगोलहरुको चेतनास्तर कमजोर बनाईदिएकोले आफुहरु पछि परेको उहांँको भनाई थियो ।
केन्द्रिय प्रवक्ता रिन्छेङ्ग तामाङ्गले शासकको जत्तिकै राजनीतिक चेतना नागरिकमा हुनुपर्नेमा जोड दिनु भयो । कार्यक्रममा अन्य केन्द्रिय सदस्यहरु प्रविना थापामगर, टेक बहादुर तामाङ्ग, प्रतिक्षा तामाङ्ग,कल्पना चौधरी , एन श्रेष्ठ लगायतले देशमा व्यवस्था परिवर्तन भएपनि मंगोलबासीको अवस्था परिवर्तन नभएको भन्दै अबको निर्वाचनमा एक ढिक्का भएर सहभागी हुन आग्रह गर्नुभएको थियो । उनीहरुले चीन लगायतका मुलुकमा मंगोलबासीको उदय भएको तर नेपालमा सधै हेपिएकोले माथि उठ्न नसकेको भन्दै अब चुप लागेर नबस्ने चेतावनी दिनु भएको थियो ।
ठूला राजनीतिक दलले जनताको अवस्था परिवर्तन गर्न नसकेको बताउंँदै आगामी दिनमा मंगोलबासीको बिकल्प नरहेको बताउनु भएको थियो ।
कार्यक्रममा बागमती प्रदेशका फणिन्द्र गुरुङ्ग, गण्डकी प्रदेशका नवीन घले, चितवनका अध्यक्ष भीम बहादुर घले, भरतपुरमहानगर प्रवक्ता मेकना तामाङ्ग ,सचिव सुरेश लामा लगायतले मन्तव्य व्यक्त गर्नु भएको थियो । सो अवसरमा विभिन्न दल छाडेर सय भन्दा बढी मंगोलबासी पार्टी प्रवेश गर्नुभएको थियो ।
