गैँडाकोट । नवलपुरको गैँडाकोटमा रहेको अक्सफोर्ड कलेज अफ इन्जिनियरिङ एण्ड म्यानेजमेन्ट (अक्सफोर्ड कलेज) ले कक्षा १२ का विद्यार्थीहरुका लागि शुक्रबार एक दीक्षान्त समारोह आयोजना गरेको छ ।
गैँडाकोट नगरपालिका वडा नं. २ मा रहेको नारायणी रिसोर्टमा आयोजित दीक्षान्त समारोहमा कक्षा १२ का ४०३ जना विद्यार्थीहरु सहभागी भएको कलेजले जनाएको छ । विज्ञान र व्यवस्थापन संकायमा अध्ययन गरेका कक्षा १२ का ४०३ जना विद्यार्थीहरु दिक्षान्त समारोहका सहभागि भएको कलेज सहायक प्राचार्य तिलकराम पन्थीले जानकारी दिनुभयो ।

गैँडाकोट नगरपालिका युवा खेलकुद तथा शिक्षा शाखाका प्रमुख डा.बालकृष्ण चापागाइको प्रमुख आतिथ्यता तथा कलेजका प्राचार्य प्रोफेसर इन्जिनियर हरि भण्डारीको अध्यक्षतामा भएको कार्यक्रममा डाक्टर बसन्त अधिकारी, म्यानेजमेन्ट काउन्सीलर डाक्टर मधुसुदन लामिछाने, आईटी काउन्सीलर शुसान्त तिवारी, बीई संयोजक प्राध्यापक भिम भण्डारी लगायतले मन्तव्य राख्नुभएको थियो ।
कलेजका सहायक प्राचार्य तिलकराम पन्थीले सञ्चालन तथा सहजिकरण गर्नुभएको कार्यक्रममा विद्यार्थीहरुको तर्फबाट विद्या विश्पकर्मा र आविद भण्डारीले अक्सफोर्ड कलेजमा पढ्दाको अनुभव र कलेजको बारेमा आ –आफ्नो धारणा प्रस्तुत गर्नुभएको थियो । कार्यक्रममा विद्यार्थीहरुले विभिन्न सांगितिक प्रस्तुती दिनुका साथै आर्कषक नृत्य समेत प्रस्तुत गरेका थिए ।