सर्वजीत थापामगर, चितवन । २४औँ विश्व दूध दिवसको चितवन कारागारका कैदीबन्दीलाई मोही वितरण गरिएको छ ।
पशु सेवा कार्यालय चितवनको आयोजना र चितवन जिल्ला दुग्ध उत्पादक सहकारी संघको सहयोगमा कारागारका ७३० कैदीबन्दी र कारागारका सुरक्षाकर्मी एवम् कर्मचारीलाई मोही खुवाइएको हो । जुन १ तारिखको दिन विश्व दूध दिवस मनाइँने गरिन्छ ।
पशु सेवा कार्यालय चितवनले तीन दिनसम्म विभिन्न कार्यक्रम गरी दूध दिवस मनाउँदै छ । बिहीवार भरतपुर पनि अस्पतालका विरामीहरुलाई मोही वितरण गरिएको थियो । पशु सेवा कार्यालय चितवनका प्रमुख एवम् वरिष्ठ पशु विकास अधिकृत सुशिल केसीले मान्छेले दूध तथा दुग्धजन्य पदार्थ नियमित रुपमा प्रयोग गर्नुपर्ने भन्दै उनले एक जनाले एक दिनमा २५० मिलिलिटर दुध पिउनुपर्ने बताउनु भयो । ‘एउटा मान्छेले वर्षमा ९१ लिटर दूध खानुपर्छ’, उनले भने । गर्मीको समयमा मोही खुवाउँदा उपयुक्त हुने देखेर विरामी र कैदीबन्दीलाई मोही विरतण गरिएको उहांँको भनाई छ ।

चितवन जिल्ला दुग्ध उत्पादक सहकारी संघका अध्यक्ष किशोर बगालेले स्वास्थ्यलाई हानी गर्ने चिसो पेय पदार्थ (कोल्ड ड्रिङ्स) भन्दा स्वास्थ्यलाई फाइदा पुग्ने मोही वितरण गरिएको बताउनु भयो । किसानका उत्पादनको समेत प्रबद्र्धन हुने भएकाले गर्मीमा मोहीलाई प्राथमिकता दिनुपर्ने उनको भनाई थियो ।

चितवन कारागारका प्रमुख कमलप्रसाद आचार्यले गर्मीको समयमा कारागारमा कोचिएर भएर बसेका कैदीबन्दीलाई मोही वितरण गरेकोमा धन्यवाद व्यक्त गर्नुभयो । कोल्ड ड्रिङ्सको सट्टा स्वास्थ्यको लागि समेत फाइदाजनक मानिने मोही सबैले प्रयोग गर्नुपर्ने उहांँको भनाई थियो । पशु सेवा कार्यालय चितवनका पशु अधिकृत दिपचन्द्र घिमिरेले शनिवार देवघाटस्थित रामजानकी बालिका आश्रममा दुध तथा दुधजन्य पदार्थ वितरण गर्ने कार्यक्रम रहेको जानकारी दिनुभयो ।