भरतपुर । केक नेपाली संस्कृतिबाट आएको परिकार होइन, तैपनि कुनै पनि महोत्सव, पर्व या भनौं कुनै खुशीयाली मनाउन केक काट्ने काम अनिवार्य जस्तै भइसकेको छ । जनमानसमा केकले आफ्नो छुट्टै छाप बनाइसकेको छ । बालबालिकादेखि बृद्धसम्मको जन्मदिनमा केक काट्दै खाइरहेको तस्बिर सामाजिक संजालमा छ्यापछ्याप्ति देख्न सकिन्छ ।
संस्थाको वार्षिकोत्सव, विवाह, जन्मदिन पनि केक विना अधुरो जस्तै भएको छ । आजकाल त आमा–बुबाको मुख हेर्ने दिन, गुरु पूर्णिमा र भाईटीकाको दिन केक लिनको लागि लामो लाइन नै बस्नुपर्ने जस्तो भइसक्यो ।
भर्खरै मात्र सकिएको कुशे औसी अर्थात बुबाको मुख हेर्ने दिनमा नेपालमा केकको व्यापार अत्यधिक भएको देखिएको छ । केही बर्ष अघि सम्म परम्परागत तरिकाले मनाउने गरिएको यस्ता पर्वहरूमा अहिले केक काट्ने चलन सामान्य जस्तै बन्दै गएको छ ।
बुवाको मुख हेर्ने दिन मात्रै भरतपुर १० सप्तगण्डकी चोकमा रहेको लभर्स पोइन्ट केक एण्ड क्याफेले अहिलेसम्मकै धेरै केक बेचेको बताएको छ । यस अगाडि मातातिर्थ औसीमा झण्डै तीन सय भन्दा धेरै केक बेचेको सञ्चालक सुजन सुवेदीले बताए । उनले भने “केकको ब्यापार यसपालि झनै धेरै भयो, यसरी बढ्छ भन्ने सोचेको पनि थिइन , चितवनको केक पसल अधिकांशले राम्रै व्यापार गरे भन्ने लाग्छ ”
अनलाइन बाट बढ्यो व्यापार

पछिल्लो समय अनलाइन व्यापार फस्टाएको छ । त्यसमा पनि केकको व्यापार अधिक हुने गरेको छ । बिदेशमा भएका सन्तानहरूले बुबाको मुख हेर्ने दिनमा अनलाइन बाट केक अर्डर गरेर खुसी साटेका उनले बताए ।
भरतपुर ९ का प्रदिप पौडेल अहिले अष्ट्रेलिया छन् उनले यसपालि पहिलोपटक बुबाको मुख हेर्नका लागि अनलाइन बाट केक अर्डर गरेर खुसीयाली मनाएको बताए । ‘यहांँबाट अर्डर गरेर घरमा पठाए , सबै सर्प्राईज हुनुभयो , यो नै खुसीको पल हो ।’ उनले भने ।

उनी जस्तै १५० भन्दा धेरैले अनलाइन र फेसबुकबाट अर्डर गरेको केक व्यवसायी सुजन सुवेदीले बताए । हामीकहा अहिले अनलाइन बाट पनि व्यापार बढेको छ । अर्डर आउँछ लोकेशन सहित हामी फ्रि डेलिभरी दिन्छौ । लभर्स पोइन्ट केक एण्ड क्याफेको अर्को शाखा भरतपुर ४ लंकुमा रहेको छ ।
क्यामेरामेन बाट केक मेकर सम्म

भरतपुर ९ का वासिन्दा सुजन सुवेदी उमेरले भर्खर २४ पुगेका उनी सानै उमेरबाट व्यवसायीक रूपमा चिनिएका युवा हुन् । २०७४ सालबाट क्यामेरा संग संगत गरेका उनले बिवाह , कार्यक्रम लगायत डकुमेन्ट्री खिच्ने , सम्पादन गर्ने काम गर्दै पछि केक व्यवसायमा हात हालेका हुन् ।

देशमै केही गर्ने योजना रहेको बताउने उनले अहिले लभर्स पोइन्ट स्टुडियो र केक सपमा गरि झन्डै ७० लाख लगानी गरिसकेका छन् । उनले यो लगानी काम गरेको आम्दानीले थप्दै गरेको बताए ।