चितवन । राष्ट्रवादी नागरिक समुह, चितवन नवलपुरले चितवनमा बिशाल मोटरसाइकल र्याली गर्ने भएको छ । सो समुहले सबै नेपालीलाई एकताबद्ध गर्दै राष्ट्रबादी सोच भएका जनतालाई र्यालीमा सहभागी हुन आव्हान गरेको हो । सो अभियान चितवनले आज भरतपुरमा पत्रकार सम्मेलन गरी हालै ज्ञानेन्द्र शाहले दिएको सम्बोधनलाई समर्थन गर्न र्याली गर्न लागेको बताएको छ ।
सो अवसरमा बोल्दै अभियानका चितवन संयोजक तथा नागरिक वचाउ अभियान नारायणी अञ्चलका प्रवक्ता मेघनाथ पौडेलले पूर्वराजा शाहले देश र नागरिक चिन्ता गर्दै आफूलाई समर्थन गर्न अनुरोध गरेपछि चितवनमा मोटरसाइकल गर्न लागिएको बताए । ‘हाम्रो यस बृहत र्यालीमा जुनसुकै देशभत्त, राष्ट्रवादी नागरिक सहभागी हुन सक्नुहुन्छ , संयोजक पौडेलले भने, देशलाई बचाउन र नागरिकलाई सुरक्षा गर्ने हाम्रो पनि दायित्व हो ।’

देशलाई भ्रष्टाचारको दलदलबाट उन्मुक्ति दिन र अमनचयन स्थापित गर्न पनि राजसंस्था पुर्नवहाली हुनुपर्ने उनको भनाई छ । कार्यक्रममा बोल्दै राष्ट्रिय शक्ति नेपालका चितवनका प्रतिनिधि किरण थापा मगरले ज्ञानेन्द्र शाहको सम्बोधन पछि उहांँको धारणा र विचारलाई सम्मान गर्न शनिबार मोटरसाइकल र्याली गर्न लागिएको बताए । ‘हाम्रो र्याली कुनै दल बिशेषको विरोध, समर्थन र कुनै आन्दोलन गर्ने उद्धेश्य होइन, मगरले भने, त्यसैले कोही पनि राष्ट्रवादी मानिसहरुलाई र्यालीमा सहभागी हुन आग्रह गर्दछौं ।’ राष्ट्रको माया केवल राजसंस्थाले मात्र गर्न सक्ने भन्दै देशको निकास राजसंस्थाले मात्र गर्ने उनको भनाई छ ।
चितवन नवलपुरमा नागरिक सहित २४ गते बिहान भरतपुर वसपार्कमा जम्मा भएर र्याली हाकिमचोक , चौविसकोठी, पुलचोक, आंपटारी हुंदै पुनः भरतपुर बसपार्क आएर समापन हुनेछ । र्यालीमा राजा आउ देश बचाउ, राजतन्त्र जिन्दावाद, गणतन्त्र खारेज गर, श्री ५ ज्ञानेन्द्र जिन्दावाद लगायतका नारा लगाईने संयोजक पौडलले बताए । र्यालीमा पांँचहजार बढी मोटरसाइकल सहभागी हुने अपेक्षा गरिएको छ ।