चितवन । नारायणगढको क्याम्पा चौरमा जारी ‘मेड इन नेपाल एक्स्पो एण्ड फुड फेस्टिबल’ आज समापन हुँदै छ । नयाँ वर्ष २०८२ को अवसरमा नेपाली युवा उद्यमी मञ्च चितवनको आयोजनामा चैत २९ गतेदेखि एक्स्पो एण्ड फुड फेस्टिबल सुरु भएको थियो । नयाँ वर्षको पहिलो दिन हिजो (सोमबार) पनि कन्सर्टमा दर्शकको खचाखच थियो ।

हिजो स्वप्निल शर्माको ‘स्वर’सँग दर्शकहरु झुमे । कन्सर्टमा करिब आठ हजार दर्शकको सहभागीता रहेको आयोजकले बताएको छ । आज अन्तिम दिन ‘उदय एण्ड झक्कास’, ‘अध्याय’ र ‘द इरेज’ व्याण्डको प्रस्तुती रहने नेपाली युवा उद्यमी मञ्च चितवनका अध्यक्ष उमेश श्रेष्ठले जानकारी दिए । ‘आजबाट एक्स्पो सकिँदै छ । सोमबारसम्म दर्शकको उपस्थिती उत्साहजनक रह्यो । आज अन्तिम दिन पनि दर्शकको उल्लेख्य सहभागीता रहने अपेक्षा गरेका छौँ’, उनले भने ।

आज पनि साँझ ७ बजेसम्म निःशुल्क प्रवेशको व्यवस्था मिलाइएको उनले जानकारी दिए । साँझ ७ बजेपछि ३०० रुपैयाँको टिकट लागु हुनेछ । एक्स्पोमा सहभागी भएका स्टार्टअप व्यवसायमध्येबाट एउटा उत्कृष्ट व्यवसाय छनौट गरी आज पुरस्कार वितरण गरिनेछ । ‘आज हामीले उत्कृष्ट स्टार्टअपलाई प्रोत्साहन स्वरुप ५० हजार रुपैयाँ पुरस्कार प्रदान गर्दैछौँ’, उनले भने ।

स्वदेशी वस्तु तथा सेवाको प्रबद्र्धनसँगै मनोरञ्जनको लागि ‘मेड इन नेपाल एक्स्पो एण्ड फुड फेस्टिबल’ आयोजना गरिएको हो । एक्स्पो एण्ड फुड फेस्टिबलमा बिहान १० बजेदेखि बेलुका ५ बजेसम्म स्वदेशी वस्तु तथा सेवाको प्रदर्शनी र साँझ ६ बजेदेखि कन्सर्ट हुने गरेको छ ।
एक्स्पोको मुख्य उद्धेश्य स्वदेशी वस्तु तथा सेवाको प्रवद्र्धन, उत्पादन बृद्धि र रोजगारी सिर्जना गर्नु रहेको नेपाली युवा उद्यमी मञ्च चितवनका पूर्वअध्यक्ष निरञ्जन न्यौपानेले बताए । फुड फेस्टिबलमा थकाली, थारु, तामाङ, नेवारी, तराई र अन्य परिकारहरुको स्वाद लिन पाइन्छ ।

त्यस्तै, एक्स्पोमा कृषि, निर्माण सामग्री, प्रविधि, हस्तकला, परम्परागत कपडा, फुड एण्ड बेभरेज, ग्रीन इन्डष्ट्री, रियल स्टेट, टेक्नोलोजी तथा इनोभेसनलगायत विभिन्न क्षेत्रमा क्रियाशील व्यवसायीहरु सहभागी रहेको उनले बताए । उद्योगी व्यवसायीले भोग्नु परेको समस्या र समाधानका उपाय खोज्न एक्स्पोमा विभिन्न विषयका विज्ञहरुलाई बोलाएर प्यानल छलफल पनि गरिएको छ ।