भरतपुर ।प्रेमवस्ती दुग्ध उत्पादक सहकारीले असल पशुपालन अभ्यास सम्बन्धि क्षमता विकास तालिम दिएको छ । भरतपुर–७ मा रहेको यो सहकारीमा २ सय घरपरिवार आवद्ध छन् । यो सहकारीले दैनिक २ हजार लिटर दूध संकलन गर्ने गर्छ । सहकारीका अध्यक्ष केशव पण्डितले लागत घटाउदै उत्पादन वृद्धि गर्न सघाउने गरी तालिम दिइएको बताए । प्रेमवस्ती क्षेत्रमा सहकारीकै एक, निजी ३ गाइफर्महरु छन् । उनले गाईपालनमा लगानी बढ्दो क्रममा रहेकाले किसानलाई प्रोत्साहन गर्न तालिम दिइएको बताए । सहकारीको नमुना गाईफर्ममा ७० वटा दुहुना गाईहरु छन् । घरमा गाईपाल्ने ठाउँ नभएकाले समेत सहकारीको सद्स्य बनेर गाईफर्म विस्तारमा लागेका छन् । १० वर्षमा १ अर्व पुँजि संकलन गरेर १ हजार गाईभैसी पालेर दूध उत्पादनको हब बनाउने योजना अगाडी बढिरहेको छ ।

व्यवसायीक कृषक समाज नेपालका केन्द्रीय अध्यक्ष आनन्द न्युरेले पशुपालनमा लागेका किसानलाई राज्यले उच्च प्राथमिकतामा राख्दै विशेष कार्यक्रमहरु ल्याउनुपर्ने बताए । दूध उत्पादनमा लागत कम गराउने उपायबारे किसान र सरकार जानकार बन्नुपर्ने बताए ।

भरतपुर महानगरको पशु सेवा शाखा प्रमुख वरिष्ठ पशु विकास अधिकृत मेघराज ढकालले घाँसमा आधरित पशुपालनमा लाग्न सुझाव दिए । दूधमा अनुदान दिएर किसानलाई प्रोत्साहन गरिएको बताए । महानगरले प्रति १ लिटर दूध उत्पादनमा ३ रुपैयाँ अनुदान दिदै आएको छ । ढकालले पशु सेवातर्फको झण्डै साढे ७ करोड बजेटमध्ये साढे ५ करोड दुग्ध क्षेत्रमै लगानी भएको बताए । तालिममा प्रमुख ढकाल, पशु चिकित्सक सन्तोष घिमिरेले प्रशिक्षण दिएका थिए । महानगर क्षेत्रमा प्रतिव्यक्ति १ सय १६ लिटर दूध पुग्ने गरि दूध उत्पादन भएको अनुमान छ ।