अब जेठ २५ देखि लिटिल फ्लावर स्कुल सेहरीमा निःशुल्क अंँग्रेजी भाषा
नवलपुर । नवलपुरको सेहरीमा रहेको लिटिल फ्लावर स्कुलले एकमहिने निशुल्क अङ्ग्रेजी भाषा कक्षा सुरु गर्ने भएको छ । ज्येष्ठ २५ गते विहिवारदेखि एकमहिने अग्रेजी भाषाकक्षा सुरु गर्न लागिएको हो ।
स्कुलका प्राचार्य फादर रोवीले अङ्ग्रेजी भाषा लेख्न, बोल्न, पढ्न र सुन्ने कलाको विकासका लागि “स्पोकन इङ्लिस” नामक कक्षा सुरु गर्न लागिएको जानकारी दिनुभयो । उहाँका अनुसार सहभागीहरुलाई कसरी शुद्धसँग प्रष्ट अङ्ग्रेजी बोल्ने भन्ने विषयमा बढी जोड दिइने छ ।
स्कुलले संस्थागत सामाजिक उत्तरदायित्व अन्तर्गत सेहरीका स्थानीय युवाहरु, विद्यार्थीका अभिभावक तथा अंग्रेजी भाषा सिक्न चाहने सबैका लागि कार्यक्रम आयोजना गरेको हो । स्कुलका प्रचार्य रोवी र केरलाबाट आउनुभएका अङ्ग्रेजी भाषाका दक्ष शिक्षक जोसेफले अङ्ग्रेजी भाषा सिकाउनुहुने छ ।

नवलपुरको मध्यविन्दु नगरपालिका र त्यस आसपासका क्षेत्रमा गुणस्तरीय शिक्षा उपलव्ध गराउने उदेश्यका साथ स्थानीयहरुको माग बमोजिम चितवनको नारायणगढमा रहेको लिटिल फ्लावर स्कुलले आफ्नो शाखा विद्यालयको रुपमा यही शैक्षिक सत्रबाट नवलपुरको सेहरीबाट सेवा दिन थालेको हो ।
आधुनिक शिक्षाका लागि सुविधासम्पन भवन र स्मार्ट बोर्ड सहित अनुभवी र तालिमप्राप्त शिक्षकहरु लिटल फ्लावर स्कुल सेहरीमा छन् ।