गैंडाकोट । नवलपुरको गैंडाकोट नगरपालिका २ स्थित गैंडाकोट ईंग्लिस स्कुल उत्कृष्ट स्कुल बन्न सफल भएको छ । स्कुललाई गैंडाकोट नगरपालिका शिक्षा युवा तथा खेलकुद शाखाले ’क’ वर्गको श्रेणी घोषित गरेको हो । यससँगै सो स्कुल ’क’ वर्गको श्रेणी प्राप्त गर्ने गैंडाकोट नगरपालिकाका कै २० मध्य एक मात्र संस्थागत विद्यालय बनेको छ ।

नगरपालिकाले पहिलो पटक विद्यालयहरुको वर्गीकरण गरेको हो । पहिलो पटकको वर्गिकरणमा नै ’क’ वर्गको श्रेणी प्राप्त गर्ने एक मात्रै विद्यालय बनेको आज (मंगलबार) आयोजित पत्रकार सम्मेलनमार्फत जानकारी दिईएको हो । नगरपालिकाले विद्यालयको अभिलेख, तथ्याङ्क अध्ययन, स्थगत अवलोकन र सरोकारवालाहरुसँगको अन्तर्वाता पनि उक्त श्रेणी प्रदान गरेको प्राचार्य हिरालाल अर्यालले जानकारी दिनुभयो । ‘हामीले ८९ वटा सूचक र मापदण्ड पुरा गरी पालिकाकै उत्कृष्ट स्कुल बन्न सफल भएका छौं ।’ प्राचार्य अर्यालले भन्नुभयो ।

नगरपालिकाको विज्ञ टोलीले विद्यालयहरुको कार्यसम्पादन परीक्षण गरेको अर्यालले बताउनुभयो । कार्यसम्पादनमा ९० प्रतिशत वा सो भन्दा बढी अंक ल्याउने विद्यालयले ’क’ वर्गको श्रेणी प्राप्त गर्ने व्यवस्था छ । जसमा गैंडाकोट ईंग्लिस स्कुलले मात्रै उक्त अंकभार प्राप्त गर्न सफल भएको थियो । यो बिषय विद्यालयको महत्वपूर्ण उपलब्धि भएको उहाँको भनाइ छ ।

गैंडाकोट ईंग्लिस स्कुल विस २०६२ सालमा तत्कालिन गैंडाकोटको आदर्श गाउँ बिकास समिति २ मा स्थापना भएको थियो । २०७२ सालमा नयाँ समूहले नयाँ व्यवस्थापनसहित विद्यालय सञ्चालन गरेको हो । त्यसयता विद्यालयले निकै महत्त्वपूर्ण उपलब्धिहरु हासिल गरेको प्राचार्य अर्यालले जानकारी दिनुभयो । गत वर्षको एसईईमा विद्यालयले राम्रो नतिजा निकालेको थियो । विद्यालयमा हाल एक हजार तीन सय विद्यार्थी अध्ययनरत छन् । यहांँ शिक्षक र कर्मचारी गरी १०९ जना कार्यरत छन ।