चितवन । चितवन अटो मोबाइल एशोसियसन को आसन्न निर्वाचनमा सबैभन्दा कान्छा उम्मेद्वार विमल पौडेलले उम्मेद्वारी दिएका छन । यही असोज ६ गते नारायणगढ स्थित पर्व व्यांक्वेटमा हुन गईरहेको एशोसियनको २२ औं बार्षिक साधारण सभा तथा १२ औं अधिवेशनका लागि सदस्य पदको लागि पौडेलले उम्मेद्वारी दिएका हुन् ।
उम्मेद्वारी दिएसंँगै आफू निर्वाचित भएमा उनले यस क्षेत्रलाई व्यवसायिक मर्यादित बनाउने प्रतिबद्धता व्यक्त गरे । अटोमोबाइल क्षेत्रमा आफ्नो परिवारको लामोसमयदेखि योगदान दिदै आएको बताउंँदै उनले यस क्षेत्रलाई जिल्लाकै नमुना व्यवसायिक क्षेत्र बनाउने अठोट गरे । हालका उम्मेद्वारमा संभवत सबैभन्दा कान्छो सदस्यको रुपमा उम्मेद्वारी दिएको भन्दै उनले आफू निर्वाचित भएमा युवा , अग्रज, समकालीन सबै व्यवसायीहरुलाई समेटेर लैजाने बताए । आफूले निर्वाचित भएपछि यस क्षेत्रमा भएका समस्या , विकृतिको समाधान गर्दै लैजाने र आफ्नो लगाव संस्थाप्रति सधै रहने उनले बचनवद्धता व्यक्त गरे ।

अधिवेशनको सरगर्मी शुरु

अधिवेशनको सरगर्मी शुरुभएसंँगै उम्मेदवारले मत माग्न र मतदाता फकाउन शुरु गरेका छन । अधिवेशनमा दुई पक्षबीच प्रतिस्पर्धा हुने देखिन्छ । हालसम्म कुल बहादुर क्षेत्रीको पक्षमा उनी सहित १५ जना उम्मेदवार छन । जसअनुसार प्रथम उपाध्यक्षमा राजेन्द्र भट्टराई, द्धितिय उपाध्यक्षमा जित बहादुर सेढाईं, तृतीय उपाध्यक्षमा देबी प्रसाद बरालले उम्मेद्वारी दिएका छन । यसैगरी सचिव पदको लागि पुरुषोत्तम पौडेल, कोषाध्यक्षमा रामशरण भट्टराई,सहसचिवमा अविनाश श्रेष्ठ,सह–कोषाध्यक्षमा विवस पियाले उम्मेद्वारी दिएका छन । यस्तै सदस्यहरुमा विमल पौडेल सहित दिपक प्रसाद कंडेल, किरण सापकोटा, प्रविण गौतम, तोयनाथ घिमिरे र अनिल कुमार चौधरी रहेका छन भने चिरञ्जीवी अर्याल निर्विरोध निर्वाचित भएका हुन् । एशोसियनको विधान अनुसार १९ जना कार्यसमिति हुनेछ भने कार्यकाल दुईबर्षको हुनेछ ।