काठमाडौं। गैर आवासीय नेपाली संघ (एनआरएनए) को युरोप क्षेत्रीय संयोजक चिन्तामणि सापकोटाले आगामी कार्यकालका लागि सोही पदमा उम्मेदवारी घोषणा गरेका छन्।
आफनो पहिलो कार्यकाल सफल भएको भन्दै सापकोटाले आगामी कार्यकालको लागि सबैको भावनालाई कदर गर्दै उम्मेदवारी दिएको बताए। लामो समयदेखि स्पेनको बार्सिलोनामा बस्दै आएका सापकोटाले गैरआवासीय अभियन्ताहरुको चाहना र सुझावबमोजिम आफूले पुनः (एनआरएनए) को युरोप क्षेत्रीय संयोजक पदमा उम्मेदवारी दिएको बताएका छन्।
एनआरएनएका गतिविधिमा सक्रिय अभियन्ता समेत रहेका सापकोटाले सबल, साझा र एकताबद्ध एनआरएनए, परिणाममुखी, पारदर्शी र समावेशी एनआरएनएको नारासहित उम्मेदवारी दिने तयारी गरेका छन्।
सन् २००७ देखि साधारण सदस्यका रुपमा प्रवेश गरेका सापकोटाले संघमा सक्रिय सामाजिक अभियन्ताको छवि बनाएका छन्। अन्य सामाजिक संस्थामा समेत आवद्ध भएर काम गरिरहेका सापकोटासँग एनआरएनएका विभिन्न टास्कफोर्समा बसेर काम गरेको अनुभव समेत रहेको छ।
