गैँडाकोट । पूर्वी नवलपरासीको गैँडाकोटमा रहेको अक्सफोर्ड सेकेन्डरी स्कूलका शिक्षक तथा विद्यार्थीहरु शैक्षिक अवलोकन तथा अध्ययनका लागि जापान जान पाउने भएका छन् । जापानको एभरेष्ट इन्टरनेशल स्कूल र अक्सफोर्ड सेकेन्डरी स्कूलविच शिक्षक तथा विद्यार्थीहरु ज्ञान आदानप्रदान गर्ने विषयमा समझदारी कायम भएसँगै शिक्षक तथा विद्यार्थीहरु जापान जान पाउने बाटो खुलेको हो ।
अक्सफोर्ड सेकेन्डरी स्कूलका प्राचार्य प्रोफेसर ई. हरि भण्डारी र एभरेष्ट इन्टरनेशल स्कूलका प्राचार्य बिष्णु भट्टले समझदारी पत्रमा हस्ताक्षर गर्नुभएको छ । नेपालीहरुले सञ्चालन गरेको एभरेष्ट इन्टरनेशल स्कूलमा क्यामरिज विश्वविद्यालययको कोर्ष पठनपाठन हुदै आएको छ । नेपालको उच्च माध्यमिक शिक्षा परिषदले समेत त्यहाँको पठनपाठनलाई मान्यता दिएको छ ।
दुई विद्यालयका विचमा भएको समझदारी पत्र अनुसार अक्सफोर्ड कलेजका ६ जना शिक्षक र १० जना विद्यार्थी प्रत्येक वर्ष एजुकेशन, टेक्नोलोजी, शिक्षण विधी, कल्चर लगायतका विषयमा अध्ययन गर्न जापान जान सक्ने अक्सफोर्ड सेकेन्डरी स्कूलका प्राचार्य प्रोफेसर ई. हरि भण्डारीले बताउनुभयो । सोहि अनुसार जापानबाट समेत शिक्षक तथा विद्यार्थीहरु यहाँको अक्सफोर्ड सेकेन्डरी स्कूल आउन सक्नेछन् ।
गत महिना मात्रै गैंडाकोटको अक्सफोर्ड कलेज अफ इञ्जिनियरिङ्ग एण्ड मेनेज्मेण्ट (अक्सफोर्ड कलेज) र चीनको नान्जीङ्ग युुनिभर्सिटी अफ एरोनेटिक्स र एष्ट्रोनेटिक्स बीच प्राज्ञिक बिषयमा समझदारी पत्रमा हस्ताक्षर भएको थियो ।
