नारायणगढ । भरतपुर भ्रमण वर्षको प्रचारका लागि साइकल राइड हुने भएको छ । एमटिबी बगको आयोजनामा फागुन २५ गते ‘टिएण्डी चितवन हेरिटेज राइड २०८०’ साइकल र्याली हुने भएको हो ।
(मंगलबार) नारायणगढमा आयोजित पत्रकार सम्मेलनमार्फत र्यालीको जानकारी दिईएको हो । ‘पर्यटन प्रवर्द्धनका लागि प्राकृतिक सम्पदाको संरक्षण गरौँ’ भन्ने नाराका साथ साइकल र्याली आयोजना गरिएको एमटिबी बगका सदस्य विश्व शाहीले जानकारी दिनुभयो ।
उहाँका अनुसार र्याली बिहान ७ बजे उद्योग वाणिज्य संघ चितवनबाट सुरु हुनेछ । उवासंघ प्राङगढबाट सुरु हुने र्याली नारायणगढ बजार परिक्रमा गर्दै बेलचोक-सानोगढी- गाँजीपुर-गोलाघाट-चितवन राष्ट्रिय निकुञ्ज,कसरा-जगतपुर-अम्रेला स्ट्रिट, पटिहानी- छितामाई थान-बफरजोन हुँदै सौराहामा पुगेर समापन हुनेछ ।
र्यालीमा चितवन र अन्य जिल्लाका करिब एक सय ५० राइडरहरु सहभागी हुने एमटिबी बगका सदस्य सुदीप कर्मचार्यले जानकारी दिनुभयो । सहभागी हुन चाहने राइडरहरुले २० गतेसम्म नाम दर्ता गराउन सक्ने उहाँले जानकारी दिनुभयो ।
चितवनका राइडरहरुका लागि दर्ता शुल्क एक हजार पाँच सय, जिल्ला बाहिरका लागि दुई हजार पाँच सय र विदेशीका लागि पाँच हजार रुपैयाँ शुल्क तोकिएको छ । महिला राइडरका लागि ४० प्रतिशत छुटको व्यवस्था गरिएको छ । सहभागी सबै राइडरको दुई लाखको बीमा गरिने उहाँले जानकारी दिनुभयो ।
आन्तरिक तथा बाह्य पर्यटनको बिकास र प्रवर्द्धनका लागि र्यालीले टेवा पुग्ने एमटिबी बगका सदस्य प्रविण श्रेष्ठको भनाइ थियो । बढी भन्दा बढी सामाजिक संस्थाहरुलाई सहभागी हुन उहाँले आह्वान गर्नुभयो ।
