भरतपुर । सेन्ट्रल कलेज अफ भोकेसनल ट्रेनिङ प्रालिको टिमले भरतपुर ११ स्थित सानो घर र भरतपुर ३ को मानव सेवा आश्रममा दर खाने कार्यक्रम सम्पन्न गरेको हो ।

टिमले आज (बिहीबार) सेन्ट्रल टिमले भरतपुर ३ बेलचोकस्थित मानव सेवा आश्रममा आश्रित अशक्त, बेसहारा, अनाथ, अभिभावकविहीन, मानसिक तथा शारीरिक रुपमा कमजोर वृद्ध वृद्धाहरुलाई दर खुवाएको हो । तीजको अवसरमा आश्रममा आश्रित आमा बुवालाई दर खुवाईएको कलेजका प्रिन्सिपल यज्ञविलास पौडेल (वाईबी) ले जानकारी दिनुभयो ।

उक्त कार्यक्रमका लागि हाल अष्ट्रेलियामा रहनुभएकी सेन्ट्रल टिमकी सदस्य बन्दना न्यौपानेले पनि सहयोग गर्नुभएको थियो । सो अवसरमा मानव सेवा आश्रमकी केन्द्रीय सदस्य एवं चितवन जिल्ला संयोजक निता केसीले सेन्ट्रल टिमले मानवीय सेवामा साथ सहयोग गरेको भन्दै धन्यवाद व्यक्त गर्नुभयो । आश्रममा हाल ७० जना वृद्धाहरु रहेका छन् ।

यस अघि सेन्ट्रल टिमले भरतपुर ११ स्थित सानो घरमा पनि दर खुवाउने कार्यक्रम सम्पन्न गरेको थियो । स्नेट्रल टिमले सानो घरमै पुगेर त्यहाँ आश्रित बालबालिकाहरुलाई दर खुवाएको हो । दर खुवाउने कार्यक्रम सँगै सानो घरको भवन निर्माणका लागि पनि सेन्ट्रल टिमले सहयोग गरेको छ । हाल अष्ट्रेलियामा रहनुभएकी सेन्ट्रल टिमकी सदस्य बन्दना न्यौपानेले यसका लागि पनि सहयोग गर्नुभएको थियो ।

सो अवसरमा सानो घरकी सञ्चालक बिमला श्रेष्ठले साथ र सहयोगका लागि सेन्ट्रल टिमलाई धन्यवाद व्यक्त गर्नुभयो । यस्ता सहयोगले सानो घरको भावी योजनालाई कार्यान्वयन गर्न मद्त मिल्ने श्रेष्ठको भनाई थियो । सानो घरमा १९ जना बालबालिका आश्रित छन् ।

कलेजका प्रिन्सिपल पौडेलले कलेजले सधैं सामाजिक उत्तरदायित्व बहन गर्दै आएको बताउनुभयो । घर घरमा तीज मनाईरहदा आश्रममा आश्रितहरुसँग सेन्ट्रल टिमले दर खुवाएर तीज मनाएको उहाँको भनाई थियो । पौडेलले सेन्ट्रल कलेजले सामाजिक क्षेत्रमा निरन्तर सहयोग गर्दै आएको भन्दै आगामी दिनमा पनि यसलाई निरन्तरता दिने बताउनुभयो ।

कलेजको आफ्नो व्यवसायबाट हुने नाफाको ३३ प्रतिशत खेलकुद तथा विभिन्न सामाजिक क्षेत्रमा खर्च गर्दै आएको बताउनुभयो । कार्यक्रममा पौडेलसँगै कलेजकी सिईओ शारदा शर्मा, भाईस प्रिन्सिपल ॠषिराम भण्डारी, म्यानेजर पार्वती न्यौपानेलगायतको उपस्थित रहेको थियो ।