चितवन । भरतपुर महानगरपालिका वडा नम्बर २ स्थित लायन्सचोकमा नयांँ व्यवस्थापन सहित न्यू मामाघर तन्दुरी रेष्टुरेण्ट एण्ड थकाली भान्छा घर सञ्चालनमा आएको छ । विगत ८ बर्षदेखि सञ्चालनमा आएको उक्त रेष्टुरेण्ट थप संरचना सहित औपचारिक रुपमा बिहीबारबाट सञ्चालनमा आएको हो ।
रेष्टुरेण्टको उद्धघाटन होटल व्यवसायी महासंघका अध्यक्ष दिनेश कुमार चुके, चितवन होटल व्यवसायी संघ, उद्योग वाणिज्य संघका पदाधिकारी, चेम्बर अफ कमर्सका पदाधिकारी लगायतले गरेका हुन् ।
उद्दघाटनपछि बोल्दै प्रमुख अतिथि समेत रहेका चुकेले हालको बिषम परिस्थितिमा पनि होटलको सेवा विस्तार गर्नु चुनौति र अवसर दुबै रहेको बताए । ‘अहिले सबै क्षेत्र तहसनहस छ , तर हामीले हिम्मत हार्नुहुन्न ।’ चुकेले भने । भरतपुर भ्रमण बर्षले होटल व्यवसायीलाई राहत दिएको भन्दै उनले दक्ष जनशक्ति उत्पादनको लागि आफुहरु तालिम केन्द्र बनाउने तयारीमा रहेको बताए ।
रेष्टुरेण्टका सञ्चालक एवं होटल व्यवसायी संघ चितवनका वरिष्ठ उपाध्यक्ष ऋषिकेश अर्यालले ग्राहकको माग र आवश्यकता अनुसार रेष्टुरेण्टको संरचना संँगै सेवा विस्तार गरेको बताए ।
‘म आफै बिदेशबाट फर्केर यही व्यवसायमा गर्छू भनेर रेष्टुरेण्ट खोलें, सञ्चालक अर्यालले भने , गुणस्तरीय सेवा सहित सेवा विस्तार गरेको हुंँ । यस व्यवसायमा मेरो लामो अनुभव र लगाव पनि छ ।’

अर्यालका अनुसार रेष्टुरेण्टमा इन्डियन , चाइनिज , कन्टिनेण्टल परिकार पाउनुका साथै स्थानीय रैथाने खानाका साथै थकाली भान्छाको स्वाद ग्राहकले पाउनेछन । हाल रेष्टुरेण्टमा ८० लख बराबरको लगानी , २०० जनालाई एकैपटक सेवा दिने क्षमता र १५ जनाले प्रत्यक्ष रोजगारी पाएको उनले बताए ।

कार्यक्रममा सहभागी भरतपुर वडा नम्बर १ का अध्यक्ष केशव महर्जन, वडा नम्बर २ का अध्यक्ष मनोज रानाभाट, होटल व्यवसायी संघ चितवनका अध्यक्ष लोकनाथ भट्ट , पूर्व अध्यक्ष कमल शर्मा, मेघौली च्याप्टरका अध्यक्ष सन्देश चापागाईं, घर बहाल उपभोक्ता मञ्च, चितवनका अध्यक्ष जनकलाल कट्टेल, उवासंघ चितवनका वरिष्ठ उपाध्यक्ष चिरञ्जीवी सुबेदी, चितवन चेम्बरका उपाध्यक्ष सोमप्रसाद काप्रीले व्यवसायलाई थप गुणस्तर दिन आग्रह गर्दै शुभकामना व्यक्त गरेका थिए । कार्यक्रममा उद्योगी, व्यवसायी, होटल तथा रेष्टुरेण्ट व्यवसायी लगायतको सहभागिता रहेको थियो ।