चितवन । चौधरी ग्रुपको सिजी कर्प अन्तर्गतको सिजी मोटर्स र सिजी मोटर्सको आधिकारिक विक्रेता युरो मोटर्सले विद्युतीय गाडी एक्सपेङ्गजी सिक्सको बिक्री शुरु गरेको छ । शुक्रबार साँझ भरतपुरमा एक भव्य समारोहका बीच एक्सपेङ जी सिक्स सार्वजनिक गरेको थियो । अत्यधुनिक प्रविधि समेटिएको एक्सपेङ जी सिक्स विद्युतीय कारलाई फूल चार्जपछि ५ सय
किलोमिटरसम्म चलाउन सकिने कम्पनीले जनाएको छ ।

एक्सपेङ जी सिक्स लन्चिङ कार्यक्रम युरो मोटर्सका अध्यक्ष रुबिन रामुदामुको अध्यक्षतामा सम्पन्न भएको थियो । सो अवसरमा बोल्दै रामुदामुले यो गाडीले चितवन लगायत वरिपरिका जिल्लाका ग्राहकको मन जित्ने विश्वास गरे । ग्राहकको विश्वास रकम्पनीको सेवाले युरो मोर्टसले विभिन्न मोडल, भेरियण्टका गाडी भित्रयाउन सफल भएको भन्दै रामुदामुले आगामी दिनमा थप नयांँ मोडलका गाडीहरु ल्याउने बताए । कार्यक्रममा युरो मोटर्सका प्रबन्ध निर्देशक सन्तोष भट्टराईले एक्सपेङ जी सिक्स सुविधा सम्पन्न रहेको बताए ।

कार्यक्रमका प्रमुख अतिथि सिजी मोटर्सका प्रमुख कार्यकारी अधिकृत (सिइओ) हेमन्त अग्रवालले एक्सपेङ जी सिक्सले इभीको दुनियाँमा तहल्का मच्चाउने दाबी गरे । नेपालमा आयात हुने विद्युतीय गाडीमध्ये २५ प्रतिशत हिस्सा सिजी मोटर्स को रहेको उनको भनाइ थियो । ग्राहकको सन्तुष्टिलाई मुख्य प्राथमिकतामा राखेर सिजी मोटर्सले नेपालको अटो बजारमा आफ्नो पकड बनाइराखेको अग्रवालले बताए ।

कार्यक्रमका विशेष अतिथि उद्योग वाणिज्य संघ चितवनका अध्यक्ष सुमनकुमार श्रेष्ठले अटो बजारमा नयाँ उत्पादन थपिँदा अर्थतन्त्रलाई चलायमान हुन सहयोग पुग्ने बताए । अर्का विशेष अतिथि भरतपुर–२ का वडाध्यक्ष मनोज रानाभाटले सुविधासम्पन्न विद्युतीय गाडी चाहने उपभोक्ताहरुलाई एक्सपेङ जी सिक्स उत्तम विकल्प हुने विचार व्यक्त गरे ।
कार्यक्रममा एक्सपेङ जी सिक्सका दुई मोडलको अनावरण रामुदामु, अग्रवाल, श्रेष्ठ र रानाभाटले गरेका थिए । चिनियाँ ब्राण्डको एक्सपेङ जी सिक्स लन्चिङ कार्यक्रम सकिएपछि सांगीतिक कार्यक्रम भएको थियो । कार्यक्रममा उद्योगी, व्यवसायी, चिकित्सक, पत्रकारलगायतको सहभागिता रहेको थियो ।