चितवन । भरतपुरको चितवन एक्स्पो सेन्टरमा चौथो चितवन स्वदेशी जुत्ता चप्पल प्रवद्र्धन तथा व्यापार मेला २०८१÷८२ सुरु भएको छ । स्वदेशी उत्पादनको प्रर्वद्धन गर्ने उद्धेश्यसहित यही बिहिबार देखि बैशाख २० गतेसम्म उक्त मेला हुनेछ ।
चितवन उद्योग संघ र नेपाली जुत्ता घरको संयुक्त आयोजनामा सुरु भएको चौथो चितवन फुटवयर एक्स्पो चितवन जुत्ताचप्पल मेलामा ६ वटा कम्पनीको स्वदेशी उद्योगबाट उत्पादित एक हजारभन्दा बढी प्रकारका जुत्ता चप्पल राखिएका छन् ।
जुत्ता चप्पल मेलामा ३० भन्दा बढी स्टल राखिएको नेपाली जुत्ता घरका अध्यक्ष होमनाथ उपाध्यायले जानकारी दिए । स्वदेशी उत्पादनका बारेमा आमउपभोक्तालाई स्थलगत अवलोकन गराई आफ्ना उत्पादनका बारेमा जानकारी गराउने उद्देश्यले चौथो पटक मेला आयोजना गरिएको उनले बताए ।

मेलामा बिएफ डियरहिल सुज, फस्र्ट वाक सुज, शिखर सुज, रन सुज, स्मार्ट सुज, सु ल्याण्ड सुज, हाईलाइफ ब्राण्डका जुत्ता, चप्पल तथा छालाबाट उत्पादित सामग्री उपलब्ध रहेका छन् । नेपालमा एक हजार पाँच सय उद्योग रहेको नेपाली जुत्ता चप्पल उद्योगमा ३० अर्ब रुपैयाँको लगानी रहेको छ ।
प्रथम दोस्रो र तेस्रो जुत्ताचप्पल मेला आयोजना गरिसक्दा ग्राहकको उत्साहजन उपस्थितीले मेला सफल र राम्रो भएकाले पुनः चौथोपटक मेला आयोजना गरिएको उनले बताए ।

करिब एक महिनासम्म सन्चालन हुने मेलामा १ करोड ५० लाख रुपैयाँको कारोबार हुने अपेक्षा गरिएको छ । मेलामा प्रत्यक जुत्ता चप्पल खरिदमा १५ देखि ५० प्रतिशतसम्म छुटको व्यवस्था गरिएको छ ।