चितवन । तीजको सांस्कृतिक पर्वलाई उद्यमशिलता र आत्मनिर्भरताको सन्देशसँग जोड्दै चितवनमा ‘तेश्रो तीज विशेष उद्यमशिल एक्स्पो तथा व्यापार मेला–२०८२’ हुने भएको छ। चितवन उद्योग संघ, महिला उद्यमी मञ्चले चितवन उद्योग संघको संरक्षकत्वमा साउन ३० देखि भाद्र १ गते भरतपुरस्थित चितवन प्रदर्शनी केन्द्रमा मेलाको आयोजना गर्न लागेको हो।
बुधबार भरतपुरमा आयोजित पत्रकार सम्मेलनमार्फत आयोजक संस्थाले मेला आयोजना हुने जानकारी दिएको हो। मेलामा बिहान १० बजेदेखि बेलुका ६ बजेसम्म विभिन्न उत्पादन र सेवाहरूको प्रदर्शनी तथा बिक्री वितरण हुने जनाइएको छ।
उद्यमशील महिलाहरूलाई एउटै मञ्चमा ल्याई अनुभव आदान–प्रदान गर्ने, उत्पादनको प्रवद्र्धन गर्ने र आर्थिक गतिविधिलाई चलायमान बनाउने उद्देश्यले यो एक्स्पो आयोजना गरिएको चितवन उद्योग संघ, महिला उद्यमी मञ्चकी अध्यक्ष सिर्जना सोतीले जानकारी दिनुभयो ।
अध्यक्ष सोतीका अनुसार मेलामा ३५ भन्दा बढी स्टलहरू रहनेछन्, जसमा हस्तकलाका सामग्री, तीज विशेष उत्पादनहरू, लत्ताकपडा, जुत्ता–चप्पल, बुटिकका उत्पादनहरू, गिफ्ट आइटम, गरगहना, सौन्दर्य सामग्री र सेवाहरू, खाद्य परिकार, मेहन्दी स्टल, बैंक तथा बीमा कम्पनी, कृषिजन्य उत्पादन र नवप्रवर्तन स्टलहरू समावेश हुनेछन्।
उहांँले एक्स्पोले लघु, घरेलु तथा साना महिला उद्यमीहरूको ब्रान्ड र कम्पनीको छवि निर्माण गर्दै बजार विस्तारको अवसर प्रदान गर्ने बताउनु भयो । साथै स्वरोजगार र सीप विकासका सम्भावनाहरू पहिचान गर्दै दिगो उद्यमशिलताको बाटोमा महिला उद्यमीहरूलाई प्रेरित गर्ने उद्देश्य पनि मेलाले बोकेको उहांँको भनाई छ ।
महिला उद्यमीहरूबीच नेटवर्क विस्तार गर्ने, लगानीका सम्भावनाहरू खोज्ने र अनुभव आदान–प्रदानमार्फत उनीहरूलाई थप सशक्त बनाउन मेलाले मदत गर्ने मेलाका कार्यबहाक अध्यक्ष मदन घिमिरेले बताउनु भयो । तीज बिशेषको अवसरमा उद्यमशीलता र मनोरञ्जनलाई जोड्न मेला आयोजना गरिएको कार्यबहाक अध्यक्ष घिमिरेको भनाई छ । संघका पूर्व अध्यक्ष त्रिलोन कंडेलले महिलालाई स्वरोजगार बनाउन र उद्यमशीलतामा आकर्षण गर्न मेलाको आयोजना गरिएको बताउनु भयो ।
तीजका अवसरमा हुने “दर खाने” नाममा देखिने विकृतिहरूको न्यूनीकरण गर्दै पर्वलाई सकारात्मक र सिर्जनशील ढंगले मनाउने, साथै त्यसलाई आर्थिक क्रियाकलापसँग जोडेर महिलालाई आत्मनिर्भर बनाउने अभियानमा यो मेला सहयोगी हुने विश्वास आयोजकको छ ।
मेलामा विभिन्न सांस्कृतिक तथा हास्यव्यंग प्रस्तुति हुनुका साथै तीज गीत प्रतियोगिता हुनेछ । प्रतियोगिताका उत्कृष्ट प्रतियोगिलाई पुरस्कारको पनि व्यवस्था गरिएको छ । तीन दिन सम्म चल्ने मेलामा १० हजार बढी अवलोकनकर्ता सहभागी हुने र ५० लाख रुपैयाको कारोबार हुने अनुमान गरिएको छ ।
